Nahimong nagmalampuson ang gipahigayon nga “Sports for Peace Celebrity Basketball” tali sa mga inilang artista gikan sa kaulohan ug mga lokal mga basketball players sa dakbayan sa Iligan ug 104^th Brigade sa Philippine Army.

Pinangulohan ni Mr. Singing Bee – Cesar Montano, pipila ka mga artista ang mihatag sa ilang higayon arun isangyaw ang mensahe sa kalinaw pinaagi sa dulang basketball dinhi sa probinsya sa Lanao del Norte ug sa siyudad sa Iligan.

Pinaagi ni kanhi gobernadora Imelda Quibranza-Dimaporo inabagan sa Dunkin’ Donuts – Iligan, nilawas nga nasaksihan sa mga mulopyo sa Lanao del Norte, Iligan City ug uban pang kasikbit nga mga lungsod ug probinsya ang mga inilang artista nga sa telebisyon ug sa sinehan lamang nila makit-an kani-adto.

Gidugokan sa mga katawhan ni-adtong Agosto 15 ang Mindanao Civic Center gymnasium, Sagadan ning dakbayan sa Tubod ang nahimong unang dula sa Celebrity All-Star batok sa mga sundalo sa 104 Brigade.

Sa mosunod nga adlaw mi biyahe ang tropa ni Cesar Montano paingon ngadto sa lungsod sa Iligan arun sa ilang dula batok sa mangdudula sa Iligan nga gipangulohan usab ni Jet Reyes.

Subling napuno na usab ang MSU-IIT Gym sa dihang nasayran sa mga taga-Iligan ang mga sikat nga mandudula gikan sa kaulohan. Makabungog nga suporta ang gipakita sa mga taga-Iligan sa mensahe sa kalinaw nga gibandira sa Celebrity All-Star Team.

“Pinaagi sa dula sa basketball atong dugang gipalig-on ang kahusay ug kalinaw sa atong lugar kay kamo man nasayod nga ang pamilyang Dimaporo maoy usa sa pinakanangusog arun atong makab-ot ang malungtarong kalinaw dinhi sa northern Mindanao”, mensahi ni kanhi Gobernadora Angging Dimaporo.

Nahimong beneficiary sa halin sa maong dula ang Soroptimist International of Iligan alang sa ilang early childhood education program.

“Dako ang akong kalipay sa inyong mainiton nga pagdawat kanamo dinhi sa inyong lugar ug kami nanghinaot nga kamo dili lamang malingaw sa among dula kung dili inyo sab nga kinasingkasing nga dawaton ang among hagit alang sa kalinaw”, matud pa ni Cesar Montano.

Ang uban miembro sa Celebrity All-Star mao sila Jestoni Alarcon, DJ Durano, John Hall, James Blanco, Carlos Morales, Jhong Hilario ug Onyok Velasco. VNL/PIO-PGLDN